Kumpulan Puisi Berbahasa Mandar Terbaik : Tommuanena Mandar (Buat Mahaputra Indonesia : H. A. Depu)

TOMMUANENA MANDAR

Buat Mahaputra Indonesia : H. A. Depu (Ibu Agung)

Inditia pemburudusanna Todilaling,

Mattarrusang pappasanna Tomepayung,

Warris manu’ sapparayana Balanipa,

Ditaji taro’da, makatoi,

Ditaji bassi, occongannami.

Inditia Imasaghena, Itarrare matindo,

            Tassayu nariwa sappulo sokko’,

            Napomagia nakke’ appe’ banua kaiyang,

            Sitinaya nasippi’ Pitu Ba’bana Binanga,

            Makanang napperri Pitu Ulunna Salu’.

Titulis di dawa’ bulawang,

Tuo manannungan di ate pa’banua,

Sumanga’na tomelo’ membere di baona lita’,

Mua’ diang to landur pasayu,

Tiling sokko’na tirabbi gayanna.

            Lumbang bandera merah-putih,

            Diong anna’ di wao, di kanang di kaeri,

            I’dami diang mellelo nalandurri Balada,

            Meberemi panser nappang ewangan malawas,

            Diolona boyang adza’ natata’bang mamaya mellelo.

Tisollor domai nasaleppang cipo’na,

Tikakkar bilua’na, pali napurai sambayang lohorna,

Natuyu’ pepasse’na, naondongngi merra’etti anna’ ma’ua,

“Silumbangang pai batangngu, muli’ai pai bakkeu,

Nasippi’ pa’issangan, basepa’ anna’ tada’ mating,

Nalappe’ la’lang buwur”.

            Naparappi isorai,

            Nawalulu’ ambal sure’ bulawang,

            Anna’ membolong diparanna sipaelo’,

            I’da’ melo’ naparetta Tokara matanna.

Melloli’ di sallambar lapi-lapi,

Lipi di parri’, matindo di sussa,

Pattang nala sulo, urang nala la’lang,

Mapponayoi paranna Tomelo’ membere di baona lita’,

Napatumballe’ lita’ pembolongatta’.

            Lelemi pammase Puang,

            Pa’da batang tappa’da pau-paunna,

            Pa’da tongammi batang Irakka payung,

            Sisara’ tubu anna’ nyawa Itarra’ jasa,

            Memberu’-beru’mi sangana, pale’I malassu pale’I sarombong.

Karya : H. Ahmad Asdy

(Yayasan Mahaputra Mandar)

Kumpulan Puisi Bahasa Mandar Terbaik : Mandar

MANDAR

Mellakka di Paku,

Sondo’ di Suremana,

Pitu Ba’ba Binanga,

Pitu Ulunna Salu’

Mandar pembolonga’u.

            Ba’ba Binanga memmata di mangiwang,

            Ulu Salu’ memmata di sawa,

            Passemandarang,

To’do pulinna.

Mandar simemanga’u,

Pole di Manurung,

Ke’de’ di anu tongang,

Me’amasse’ di INDONESIA.

(Dikutip dari buku pelajaran bahasa daerah Mandar untuk SMP tahun 2000)

Kumpulan Puisi Mandar Terbaik : Pappasang Tomepayung_Mara'diya Balanipa Mandar

PAPPASAN TOMEPAYUNG :

MARA’DIYA BALANIPA MANDAR

Dao melo’ niarakke’,

Apa’ duan rupai tu’u niarakke’,

Niarakke’I saeyyang anna’ niarakke’I kanene’.

Niarakke’ tongangi saeyyang,

Apa’ maladzi nisapu-sapu mane ningangnga’,

Anna’ mane nipessawei,

Niarakke’ tongangi kanene’,

Apa’ ninawa-nawadzi nanipatei.

Sangga’ apadzi tia,

Pakarayai to tondorai’mu,

Pakala’bi’I sippatummu,

Asayangngi to tondonaummu.

(Dikutip dari buku pelajaran bahasa daerah Mandar untuk SMP tahun 2000)

Kumpulan Puisi Mandar Terbaik : ITOTALLELE (Yang Pantang Surut) Buat Mahaputra : Prof. DR. H. Baharuddin Lopa, SH. (Tomatindo di Kalibata)

ITOTALLELE

(Yang Pantang Surut)

Buat Mahaputra : Prof. DR. H. Baharuddin Lopa, SH.

(Tomatindo di Kalibata)

Naposoei soena,

Naposeppa’i seppa’na,

Napokedzoi kedzona,

Itarrare di allo,

Totammatindo di bongi,

Mappikkirri rannunna pa’banua.

Iyamo dighallar disanga,

Pappang tarra’bana Pambusuang,

Ayu tassape’na Balanipa,

Tuppuang bassinna to Mandar,

Randang tambottunna Sulawesi,

Sapparaya tarrarana Indonesia.

Mua’ purami napau,

Pura tomi napalandang,

Napemaliangi nali’ai,

Mau natisollor doe,

Nasisullina mata gayang,

Tisembe’ kondo bulo.

Tenna’ topa nasiapi’ lita’ anna’ bulang,

Tisamba’ lembong sallolo’anjoro,

Tale nalelei sejari,

            Dotai silakka’ ulu anna’ salakkana,

            Dadzi namarrusa’ allewuang.

Mau nalimbang nyawa,

Tale nalalla’i pura loa,

Disesena atongang,

Namappatumballe’ lita’ pembolongatta’.

Karya : H. Ahmad Asdy

(Yayasan Mahaputra Mandar)