Kumpulan Puisi Berbahasa Mandar Terbaik : Buwa Rangassu

BUWA RANGASSU

Oleh : Rusman Raymanda

Bi’ar di biring bonde’na Dato’,

Menynyawa batu di Tajong,

Mekkae’ cumi’ di Rangas Timur,

Membura’ loka-ressu di Pangale.

            Mattangngar turingan di Donggala,

            Massallar rabe di Tammalassu,

Me’illang to Salama’ sung di Alangan,

Mettuppu di alle’na Passarang anna’ Soreang.

Tambus bakko di Poyawa,

Menynyawa api di Pallo’beang,

Mettandu’ banggulung di Rangas Barat,

Membura’ kurarra’ lameayu di Uma.

            Mattangngar dapo’ di Salissingan,

            Massallar puka’ di Pa’besoang,

Me’illang to salama’ di Tassalili,

Mettuppu di are’na kota Majene.

Kappal panongkol siarappe di alangan,

Marrappe batu lappasna turingan,

Mappittuleang puka’ banggulung,

Mappadottong jamanna posasi’.

            Beke siame’ di rambang,

            Marrappe ayu ranni anna’ passama’,

Mappittuleang ande laeng di Para’baya,

Mappadottong jamanna panguma.

Bau tapa sarombong di nawang,

Jepa siateles di okanna lapurang,

Karumbane’ siaro’do di rakki’,

Mappadottong ande nyamanna to Rangas.

            Buwa Rangassu ….

            Me’issi buwe mammis nighollai,

            Maloppo gandong pute nianjoroi,

            Simammisan sukku’ sumanga’na pakkappung,

Siloppoan barakka’ asselna pa’banua.

Eh…. Inggai mammesa sara,

Matto’do’ Rangasta’ jadzi mapia,

Namappamasarri Mandar, lita’ pembolongatta’,

Mappadottong tinja’na Indonesia.

*) Rangas adalah salah satu daerah kelurahan di Kec. Banggae, Kab. Majene. Ini adalah tempat kelahiranku, kampung halamanku....

Rangas TamMalassu-Majene, 9 Januari 2014