Kumpulan Puisi Mandar Terbaik : Kande-kande (Kue-kue Penganan Khas Mandar)

KANDE-KANDE

(Kue-kue Penganan Mandar)

Oleh : Rusman Raymanda

Mua’ mali-malimangmi,

Membuwami buwa rangas,

Mamengga tomi baona apang,

Mittokkomi sulapa’ putu,

Me’ulele’mi putu manyang,

Sarombongmi berre-berre’ anna’ kambossol,

Mittallo’ tomi tallo’ panynyu,

Nasaba’ napittuleangmi karebana,

Loa lilana To Mandar,

Namappamammis issi are’na.

            Anna’ mua’ tangallomi allo,

            Ressu’mi loka janno,

            Membuwa tomi issinna tara’ju’,

            Toyangmi dzai’ koppe-koppe’ lange’,

            Bubwur tomi sakko-sakko’,

            Malepongmi tokkona bikang,

            Tibwalulu’mi sagarna dadar,

            Tijijirmi garemena kacipo’,

            Tibu’usmi garattas alangkose’,

            Tiukir tomi birinna jalan kote’,

            Nasaba’ napomelo’mi rupanna,

            Loa tumbur elorna To Mandar,

            Namappamaloppo issi are’na.

Lambi’mi wattu arawiang,

Maressa’mi pallu bwutung,

Membuwa tomi pisang ijo anna’ loka sari,

Perumbumi bu’usna roko’ unti,

Mamengga tomi lewunna lame-lame,

Mareremi issinna ode-ode,

Nasaba’ nasenga’mi sarrinna,

Loa wattu bukaNa To Mandar,

Namappasa’ga issi are’na.

            Mau nabonginna,

            Perumbu dzuapai bandang lojo’,

            Tumbur tomi uwainna sara’ba,

            Meppuli’mi uwainna ule-ule’,

            Mekkambu-kambumi lambu-lambung,

            Tikui’mi issinna buroccong,

            Mamengga tomi tangngana cucur te’ne’,

            Membuwami buwa sappang,

            Tanda mai’dinna kande-kandena To Mandar,

            Mappamanyamang sukku’na lolong di bwaro.

Rangas TamMalassu-Majene, 16 Januari 2014 

Kumpulan Puisi Mandar Terbaik : Karumbane' Mandar

KARUMBANE’ MANDAR

Oleh : Rusman Raymanda

Matti sau biring sasi’,

Mara’e uwai  naottong lumi’,

Loppa’ lino napateng allo,

Mendai’mi karumbane siatinda’.

            Polemi kalauman sialene’,

            Pole tomi tewa siateles,

            Turummi tedzo-tedzong mambawa kacilo,

            Tumbur tomi tia cappa’lea’ me’alatto,

            Pole bomi bulu wawi sialappis,

            Sipanginoang karumbane’ di naong sasi’.

Siajijir baskonna pandari,

Siaillong patteba’ jare’ abang,

Siasallar puka’ di bwiring alangan,

Sipanginoang karumbane’ di bwaona sasi’.

            Tiro’domi karumbane’ di rakki’,

            Siatinda’mi lette’na di bwao api,

            Nasui’mi le’mai di kalaccinna,

            Naniemai loppona issinna,

            Nanapassiandeangan siola jepa.

Lappasmi karumbane’ di sasi’,

Menjadzi karu’ba’mi di pottana,

Nala panginoangmi sana’eke,

Menjadzi sa’bi’ di lilana To Mandar.

*) Karumbane' adalah sejenis kerang laut yang bercangkang seperti kloman yang hidup di pantai dan terlihat ketika air surut.

Rangas TamMalassu-Majene, 15 Januari 2014

Kumpulan Puisi Mandar Terbaik : Pattu'dunna Cinna

PATTU’DU’NA CINNA

Oleh : Rusman Raymanda

Mammula’ sita dilalang tindo,

Napatidzoia’ tanda diloana pangipi,

Polemi I Kandi’ membura’ pecawanna,

Diolo mata’u di bi’arna allo.

            Landurmi sayyangNa bidadari,

            Naperoai Kandi’u messawe,

            Nasippi’ pesarung mala’ika’,

            Natindorri rawana sayang-sayang.

Mendai’mi I Kandi’ ma’bayu pokko,

Melipa’ sa’be sure’ salili,

Mappatangngar alus rupanna,

Mesimbolong sarrinna beru’-beru’,

Nala’lanni surugha pa’mai’,

Mappatumbur pattu’du’na cinna.

            Ughallarmi kalinda’da’ bunga ate,

            Diolo pecawanna I Kandi’,

            Dialle’na cilla’ matanna,

            Upappararean senga’na nyawa,

            Maumo sangga’ mappatu sallang.

Kandi’u pattu’du’na cinna,

Iya bappa tia narua ateu,

Namappasannang dottongna sarau,

Menjadzi tongan pangipi’u,

Lambi’ di bungasNa pamboyangang.

Rangas TamMalassu-Majene, 12 Januari 2014